Hoxe celebrouse na Federación Galega de Municipios e Provincias (FEGAMP) a sinatura do «Protocolo para a prevención e actuación ante situacións de violencia laboral externa no Servizo de Axuda no Fogar (SAF)», que é o resultado do traballo da mesa composta por todas as administracións e polas organizacións representativas dos ámbitos sindical, empresarial e profesional.
Asinaron o protocolo o presidente da FEGAMP, Alberto Varela, o delegado do Goberno, Pedro Blanco; a xerente do ISSGA, Adela Quinzá-Torroja; a presidenta do Colexio Oficial do Traballo Social, Rosario Capelo; a secretaria xeral de CCOO Habitat Galicia, Alejandra Gesto; o secretario de Organización de CIG Servizos, Pedro Pérez; a responsable de Administración Local de CSIF Galicia, Yolanda Martínez; o secretario do sector da Dependencia de UGT SP Galicia, Javier Martínez; o representante de ASADE, Alberto Domínguez e o secretario de AGESAF, Francisco Montoto. Ademais, asistiu ao acto a subdirectora xeral de Autorización e Inspección de Servizos Sociais da Consellería de Política Social, aínda que non asinou o protocolo.
O protocolo ten como finalidade establecer un marco de prevención, actuación e seguimento fronte a situacións de violencia externa que afectan ás persoas traballadoras, especialmente mulleres, na prestación do SAF, e que poden darse nos domicilios das persoas usuarias, nos desprazamentos entre domicilios, nas comunicacións, nas actividades sociais ou de formativas vencelladas co traballo.
Incorpora un amplo procedemento de actuación fronte á violencia que van dende o análise diario dos factores de risco de agresión tanto por persoas que convivan coa persoa dependente como de animais, ata o abandono dese domicilio e a activación dos sistemas de alarma previsto e de comunicación co 112, sempre en coordinación e comunicación inmediata coas persoas responsables do servizo, para solicitar a suspensión cautelar do servizo á Consellería de Política Social. E sempre, sen deixar sen atención á persoa dependente, que deberá recibir unha atención alternativa.
Ademais do protocolo, asinouse un documento de compromisos e cambios normativos (excepto a representación do ISSGA e da Consellería de Política Social) que, entre os seus contidos, destacan a proposta de creación dun Observatorio Autonómico do SAF, a recuperación da obrigatoriedade do informe social na solicitude de dependencia, a habilitación dos concellos para a suspensión preventiva por risco ou agresión, e o reforzamento do financiamento do SAF para garantir a aplicación do protocolo.
A elaboración deste protocolo de seguridade para o persoal do SAF promoveuse pola FEGAMP pouco despois do tráxico suceso no que a traballadora do SAF, Teresa de Jesús González, foi presuntamente asasinada pola parella da persoa dependente que atendía no desenvolvemento do seu traballo no Porriño (Pontevedra).
O presidente da FEGAMP, Alberto Varela sinalou que «a pesares da complexidade do asunto e da realidade do SAF, nesta mesa temos traballado de xeito construtivo e plural, acadando consensos para os contidos do protocolo e para reclamar os cambios normativos que permitan ao protocolo ser útil nas súas funcións».
Para Alberto Varela, o proceso de elaboración do protocolo serviu para «avaliar de xeito exhaustivo as dificultades na aplicación das medidas preventivas de riscos no desenvolvemento da actividade do SAF sobre as persoas dependentes atendidas nos seus domicilios», tendo en conta que «a alta demanda deste servizo e as particulares condiciones territoriais de cada concello, xunto coa falta de financiamento que padece, fan cada vez máis complicada a súa xestión polos concellos».
