Un home perdeu a vida esta tarde tras sufrir un accidente co tractor que manexaba na parroquia de San Salvador de Budiño, no termo municipal do Porriño. O vehículo envorcou e a vítima quedou atrapada debaixo do mesmo.
O aviso realizouse ás 19:40 horas, momento no que un veciño do falecido contactou co 112 Galicia para alertar do sucedido no lugar do Mosteiro.
De inmediato, dende o Centro Integrado de Atención ás Emerxencias (CIAE) 112 Galicia pasouse aviso ao Servizo de Urxencias Sanitarias de Galicia-061 e aos Bombeiros do Porriño. Do mesmo xeito, informouse aos axentes da Garda Civil e da Policía Local, así como aos efectivos de Protección Civil da localidade.
Unha vez no punto, os equipos de emerxencia desprazados tiveron que intervir para rescatar ao home de debaixo do vehículo. Malia os esforzos dos servizos sanitarios, só se puido confirmar o falecemento da vítima.
