Un total de 6.533 persoas están convocadas mañá, sábado, nas sedes da Coruña e de Vigo aos procesos selectivos da oferta pública de emprego (OPE) para os subgrupos A2, C1 e C2 da Administración Xeral do Estado. As probas distribuiranse en horario de mañá e tarde.
A Delegación do Goberno en Galicia colabora coa Comisión Permanente de Selección do INAP, dependente do Ministerio de Transformación Dixital e Función Pública, na organización e desenvolvemento destes procesos na Comunidade. Para iso, mobiliza un total de 360 persoas, empregadas públicas, para as tarefas de organización, loxística e vixilancia das probas. Estas desenvolveranse en instalacións das universidades da Coruña e de Vigo, nun total de 121 aulas repartidas por 5 facultades dos campus de Elviña (UDC) e Lagoas Marcosende (UVI).
En total, son 10 procesos selectivos de ingreso libre e promoción interna para o Corpo de Xestión e o Corpo de Xestión de Sistemas e Informática da Administración do Estado (subgrupo A2); para o Corpo Xeral Administrativo (C1), Corpo de Técnicos Auxiliares de Informática da Administración do Estado (C1) e para o Corpo Xeral Auxiliar da Administración do Estado (C2).
Todas as probas celebraranse na xornada do sábado en horario de mañá, excepto as probas do subgrupo A2, que celebrarán na xornada de tarde a proba do suposto práctico.
Do total de persoas convocadas, 3.674 teñen como sede de exame A Coruña e 2.859, a cidade de Vigo. Ademais, 1.239 optarán a unha praza do subgrupo A2 e 5.294 optarán aos subgrupos C1/C2.
A convocatoria destes procesos ofrece máis de 18.000 prazas para ingreso libre e promoción interna correspondentes á oferta de emprego público de 2025 e acumuladas de 2024 e 2023.
