O FIV de Vilalba ten xa activo o prazo de reserva de prazas na súa Zona de Descanso, o espazo habilitado para o público asistente á XIX edición do festival. As parcelas poden reservarse desde hoxe ás 12.00 horas a través da páxina web oficial do evento por un prezo de 15 euros máis gastos de xestión e estarán situadas no Estadio Roca, como espazo ao aire libre, e no Pavillón Ínsua Bermúdez, como opción en interior. Cada unha delas terá capacidade máxima para catro persoas e permitirá instalar unha única tenda desa capacidade.
Con esta apertura, o festival facilita a planificación da estancia para o público que se desprazará a Vilalba os días 24 e 25 de abril para asistir a unha nova edición do FIV, que reunirá no seu cartel nomes como Carlos Ares, Alcalá Norte, La M.O.D.A., Ángel Stanich, Repion ou Puño Dragón, xunto á habitual programación de día na Praza do Concello. Os abonos e as entradas por xornada continúan dispoñibles na páxina web do festival.
Dúas opcións para a estancia do público
A Zona de Descanso do FIV volverá ofrecer dúas alternativas para adaptarse ás preferencias do público asistente. O Estadio Roca funcionará como espazo ao aire libre, mentres que o Pavillón Ínsua Bermúdez estará habilitado como espazo pechado. En ambos os casos, a reserva realízase por parcela, cun máximo de catro persoas e unha única tenda por espazo.
Este servizo constitúe unha das prestacións máis demandadas polo público que cada ano se achega ao festival desde distintos puntos de Galicia e do resto do Estado, ao facilitar unha opción cómoda e accesible para vivir o evento durante toda a fin de semana.
Un cartel repartido en dúas xornadas
A programación musical do FIV arrancará o venres 24 de abril con Carlos Ares, Alcalá Norte, Celia Becks, Futuro Alcalde e Rapariga DJ. O sábado 25 será a quenda de La M.O.D.A., Ángel Stanich, Repion, Puño Dragón e Grande Osso, nunha xornada que volverá estenderse tamén ao centro da vila coa programación de día na Praza do Concello.
Nese espazo aberto ao público celebraranse propostas xa emblemáticas do festival, como a actuación da Banda de Música de Vilalba e o FIV Stars – Karaoke con Esteban, ademais dunha sesión DJ e dunha zona gastronómica con diferentes opcións para completar a experiencia.
O festival conta co apoio da Xunta de Galicia, a través da Axencia de Turismo de Galicia, no marco dos Concertos do Xacobeo e co patrocinio do Concello de Vilalba, da Deputación de Lugo e de Vibra Mahou, a plataforma musical de Mahou Cinco Estrellas que impulsa experiencias arredor da música en directo.
